老翻華納，股東夠辣 (胡孟青 02-11-2009)

天公造美，連美國的經濟數據都出奇地「生性」，令市場瞬間化悲憤為力量，極積支持內地創業板呢個金融「富貴門」。此門一開，頓時有８６人擠身億萬富豪行列，當中更有五人身家超過１０億元。　　其實這個數只係非常保守的估計，還未計及首日瘋狂的升幅，全部２８隻首日都漲停﹗當中有２０隻市盈率超過一百倍，認真心血少啲都嚇餐死。　　早前同大家分析過的做心臟通波仔個波仔的樂普醫療（深：３００００３），咁有明星相梗係爆升１﹒８倍，不過真係有明星撐場的華誼兄弟（深：３０００２７），開市即升１２２％，其後升兩倍有多，市盈率３１０倍，好有可能係最球最貴的股分。　　　　　　　　　　　　　　　　　　＊星光家族＊　　叫得兄弟的公司，總教人有點戒心，雷曼兩兄弟千年道行一朝喪。華誼兄弟貴為中國「華納兄弟」的翻版，喺極度重視名人效應的中國市場果然非常受落，比Ａ股６１２４點高位時的６０倍ＰＥ高五個「開」都唔嫌貴，最開心的當然係背後的「星光家族」。　　大股東王忠軍及王忠磊兩兄弟合共持有４５﹒８７％股權，即時躍身成為億萬富豪，以發行價２８﹒５８元計，能夠成功上市已穩袋１４億元，若以首日成８０元以上計，則相當於３６億元，暴發戶就係咁解。　　到底呢對兄弟加埋一眾名星股東︰馮小剛（２﹒２９％）、電視劇導演張紀中（１﹒７１％）、黃曉明（１﹒４３％）、孫曉璐（２﹒８５％）、李冰冰（０﹒２８％）、張涵予（０﹒２８％）及阿里巴巴馬雲（１０﹒９７％）、江南春（４﹒６８％）及泰山會的魯偉鼎（４﹒６８％），能否發展成為真正的中國「華納兄弟」﹐就要睇下業績。　　　　　　　　　　　　　　　　　　＊中萊塢＊　　中國市場大，去年全國電影產量１４０部，當中好似華誼兄弟的民營製作就佔６８％，亦佔全年票房８０％，華誼的市佔率（１５﹒５７％）謹次於國家隊中影集團的１６﹒９７％。　　不過亦係因為初起步，０６－０８年經營現金流皆處於負數，到今年上半年才稍見正數，頭半年轉虧為盈。由於公司的資金流極度受制於電影票房，風險也相對高。唔同地產發展商，樓起好咗即使唔好價，可以捱下等好市時再賣，電影的時間值耗損有如窩輪，唔收得就係唔收得，再放映長啲時間都無用。華誼年產量只得六套更令人擔心，是但有一兩套虧大本的話怎辦？公司年產６００集影視製作能否頂得住？　　不過市場自有一番解釋，點解佢值３００倍ＰＥ。據講佢地諗住搞個「中萊塢」，拍戲之餘又有戲院甚至起主題公園﹗唔係無可能，不過若然佢地可以製作出有如「喜羊羊」咁成功的產品先再講。