《青姐手記－胡孟青》四縱四橫儲鐵路股 23-10-2009

《青姐手記》時速高達每小時３５０公里的武廣高鐵即將通車，標誌著內地「四橫四縱」的鐵路網規劃得到初到落實，到時成效同反應係點，將會影響正在興建當中的工程及將來票價，據估計，到時武廣高鐵收費將不多於５００元人民幣，比起飛機平，但仍比要搭成十小時的傳統火車貴一大截，有批論擔心未必會咁受市場歡迎。　　民眾是否受落仲要睇通車時的表現，係咪準時夠快，服務水平是否達標，但大家不能不認識係「四橫四縱」的規劃，將會對長三角、珠三角及環渤海地區的經濟發展有著極深遠的影響。　　不消五年時間，１﹒３萬公里的客運專線將建成啟用，「四縱」即北京－上海、北京－廣州（香港、深圳）、北京－哈爾濱（大連）、上海－深圳（沿海）等４條客運專線；而「四橫」即徐州－蘭州、上海－昆明、青島－太原、上海－成都等另外４條客運專線。這八條專線加起來，將令長三角上海、南京、杭州縮少成數小時的經濟區域，珠三角內的香港、廣州、遠至武漢都只需半天車程就可走遍。　　　　　　　　　　　　　　　＊最後將「還鐵於民」＊　　起鐵路，向來都係投資期長，且係蝕錢之作。由２００３年開始，中央投放於客運、煤運、西部大開發等鐵路建設超過兩萬億元人民幣，今明兩年再有多兩萬公里鐵路要建，係中央為救經濟保八，谷大國內生產總值的重頭戲，隨著項目逐步落成，政府下一步將會部署如何「退市」，將營運權交出來，再進一步以股改形式私有化相關資產，於市場籌集資金發展新項目，實行「還鐵於民」。　　鐵路建設乃係列入關乎國家安全的資產，要市場化都要由國企主導話事權。觀乎中港兩地已上市的鐵路股，一隻手都數得晒。近日有傳，鐵道部要求年底前完成注入包括太原鐵道部還未注入的資產，及塑黃鐵路股權，約值四百億元以上。　　　　　　　　　　　　　　　＊廣深鐵路可分注吸納＊　　只得Ａ股部分的鐵路股未夠市場化，廣深高速（００５２５）係唯一可被注資對象。佢係市場上唯一喺ＡＨ股上市，加埋有美國預托證券的國企鐵路股，亦係廣州鐵路局全資持有的子公司，係第一家鐵路公司掛牌上市。眼前業務只得深圳－廣州－坪石段長途車及廣九直通車，根本唔係賺大錢的業務，上半年純利仍係跌緊１１％。不過隨住經濟改善、相信客貨運量都有所提升，加上有中央注資概念，股價落到三元呢啲位，短線免問，但長線就係分注吸納的好時機。《獨立股評人　胡孟青》