《青姐手記－胡孟青》19-10-2009

《青姐手記－胡孟青》聯想靚仔太貴，靜靜地睇ＡＳＭ
　　《青姐手記》香港豪宅大玩包裝，明明得三十幾層樓「老襯底」就扮「鱷魚頭」賣８８樓「獨立屋」，加埋海外名設計師排場，令住宅可以遠超佢本身價值，化身成為一件無價的藝術品，市場手法極之高明，可列為Ｍａｒｋｅｔｉｎｇ課的經典成功例子。　　同樣喺包裝上有明顯改善的聯想（００９９２），無論新推出的Ｎｅｔｂｏｏｋ或是Ａｌｌ－Ｉｎ－Ｏｎｅ的桌上電腦，潮味十足，價錢亦十分大眾化，最平只需唔夠五千元就可搬返屋企，想好啲買高清１０８０版都不用九千元，成功搶埋傳統高清電視生意。　　Ｎｅｔｂｏｏｋ大行其道，吸收第一代平面方角系列，聯想終於可以擺脫ＩＢＭ太ＯＵＴ的造型，榮登全港銷量冠軍。唔單止係香港，睇返ＩＮＴＥＬ令人有意外驚喜的業績可見，來自Ｎｅｔｂｏｏｋ的需求已成了大勢所趨，一般消費者不再追求頂尖而做唔著的科技，最緊要係價錢平的簡單上網文書用電腦。　　　　　　　　　　　　　　　＊ＡＳＭ有條件食正電腦熱浪＊　　去年全成全球Ｎｅｔｂｏｏｋ賣出咗１４６２萬台，遠超過預期３００萬台多，而Ｄｉｓｐｌａｙｓｅａｒｃｈ最新數據顯示，上季全球Ｎｅｔｂｏｏｋ銷售大幅增長３７％，此消彼長，傳統Ｎｏｔｅｂｏｏｋ的銷售額急速下跌，現時超過２２％的付運量係來自Ｎｅｔｂｏｏｋ，佔整個市場１２％，發展空間仍大。華碩係率先成功搶佔市場，隨後各大廠商如聯想、富士通、ＡＣＥＲ、最後連惠普、冠捷都加入混戰。　　要捕足電腦市場新形勢，除了買第線電腦股，仲可以留意下ＡＳＭ太平洋（００５２２）呢間有近四十年歷史的老字號，佢係全球第二大的半導體後道設備製造商。聽落好似好複雜，即係生產整半導體電路嗰部機，性質有點類似昆明機床（００３００），簡單來說係「整機器的機器」。　　公司上半年營業額減少５１％至１４億元，盈利倒退８８％得番７４９０萬元，但要留意的係，原來係基數效應作怪。集團０８年第二季的營業額創新高，而今年第二季訂單已有明顯改善，同去年比較只係單位數跌幅，而單係今年第二季的盈利已可抵銷第一季的虧損，目前現金水平有超過７億，負債比率３０％，絕對有條件食正電腦熱浪。《獨立股評人　胡孟青》