順勢而炒（４）(23-10-2009)

美股走勢好飄，前日單日轉向大跌，昨日反向大升，麥當勞、3M和Travelers等公司業績好過市場預期，金融股及零售股顯著造好，美股扭轉兩日的跌勢，杜指開市略為反覆，之後就逐級攀升，一路升到尾，至10105點才回順，收復前兩日的大部份失地。杜指收報10081點，漲132點或1.3%；標普500指數收報1093點，升12點或1.1%；納指升15點或0.7%，收報2165點。紐約證交所成交略為縮減至13億股。杜指期貨最新報10054點，比現貨低水27點。

杜指昨日高位10105點，距離上一日的全年高位10119點，只是一步之遙，美股又重拾向上動力，似乎唔拾得跌。美股交易員話，股市在高位，人心有啲波動，人人都覺得股市超買，所以一唔對路就沽貨套利，但之前好多次個市跌一陣又再向上，基金都唔係太敢離場太耐，怕沽錯貨買唔番，而家進入咗第4季開始近年結，佢地唔想最後年尾埋數落後於人，所以一見無事又入番場，令大市非常反覆。

另外，美國經濟咨商局(Conference Board)報告，截至9月份美國領先經濟指標指數已連續第6個月攀升，創下該指數自2004年以來最長連續上漲紀錄，表明美國經濟狀況仍在持續好轉。報告表明，美國9月領先經濟指標指數環比增長了1%，此項報告的10個分項指數當中有8項指數好轉。

紐約聯邦儲備銀行總裁杜德利表示，聯儲局對抗危機的緊急支出計畫可能不會出現虧損；保險商Travelers Cos Inc上調全年盈利預測；美國運通宣佈，第三財季的純利同比下降21%，至6.4億美元或每股53美仙，但仍遠高過市場預期的40美仙。加上地區銀行PNC、SunTrust與Fifth Third的業績令投資者信心大增，金融股全線造好，美國運通漲3.8%，Travelers勁升7.7%，係表現最好的杜指成份股；PNC更飆升13%！銀行股整體大漲4.7%；保險類股上升3.9%，在24個行業中排行第一及第二位，成為推動大市向上的主要動力。

世界最大的快餐連鎖企業麥當勞宣佈，第三財季盈利增長6%，至每股1.15美元，好過預期的1.11美元；而期內營運超過13個月的餐廳生意上升了3.8%，高過市場預期的2.9%。麥當勞美國餐廳的同店銷售額增長了2.5%。老麥股價上升2%。服裝零售商J. Crew亦因銷售額與利潤率提高而上調了每股純利目標，該股暴漲15.2%。帶動整個零售行業上升1.7%。

標普500成份股表現最好嘅係紐約時報，公司表示因成本削減和報紙售價上漲所致，季度營收和獲利超預期，不過，廣告銷售下降，該股飆升22.5%至10.72美元。

港股美國預托證券造好，ADR港比指數收報22428點，比香港收市高217點或1%。匯控收報89.93元，比香港收市高1.2%；中移動收報76.68元，比香港收市高0.5%。

網友阿Ray問「順勢而炒」的題目時，問起炒股票和炒匯係唔係一樣，係唔係唔只睇個股走向，仲要睇大市大勢，而睇大勢又睇乜嘢技術指標等等。

順勢而炒最緊要睇個勢，炒股和炒匯一樣，唯一分別是匯市是最大的投資市場，人為操控較少，但股票市場(如香港)的體積較細，受操控的可能性較大，可以睇圖，但唔能盡信個圖。

若炒大型股，如藍籌、紅籌、國企，一定要睇大勢，藍籌跟恒指走勢，紅籌國企除咗跟港股走勢，亦跟內地股市走勢，內地股市早前升到突上咗3400點樓上，好多國企都跟住炒上全年高位，後來內地股市回佢地就跟住回，而家港股創咗今年新高，但不少國企都未去番今年高位，由此可見佢地受內地影響多過香港。

睇圖睇走勢，要知道自己睇緊長、中，抑或短期走勢，短期睇一、兩個星期，中期睇一兩個月，長期睇一兩年。如今是一個衰退後復甦的股市，長、中期大趨勢向上，但升到咁上下，都可以有一個短期調整，升兩三個星期，調整番一兩個星期，睇圖時你要知道你自己身處在什麼位置。

我睇圖的方法好簡單，拉一個一年圖，睇到一級級上就係升市，睇到一級級落就係跌市，以此確定大市中長期的大方向。大市可以轉勢，例如佢一級級落，落到某一水平不再創新低，反彈之後，開始一浪高個一浪，下一個升浪，升穿番上一個反彈浪浪頂，就可能係轉勢，開始番一個一級級上的形態。我都會睇吓平均線和其他技術指標，但認為幫助有限，如果有一種技術指標好得，人人去用，齊入齊出，咁就唔成股市啦。

鬼佬炒嘢比較科學化，例如經常統計長期走勢牛市通常幾長，升幅幾大，升到幾多出現中期調整，睇中短期升市升幾長，跌幅幾多，調整市幾長，跌幅幾多，睇住數據做人。例如佢計出今年升市通常升3個星期，調整個幾兩個星期，上升時升10至12%，下跌時跌5至7%(只是假設數據)，到佢見到個市升咗3星期，升幅有11%時，佢就會認為呢個升浪開始「老」，佢地會減倉，因為再博佢升的值博率已經不高，反之睇時亦用同一個方法去睇。所以佢地唔係憑感覺，而係比較科學化地判斷。升到咁上下佢地憑數據擔心股市快要跌時，當然不一定佢地一沽即跌，有時沽完全再升，但專業的炒手通常都唔打算食到太盡，例如平均升幅係10%，升到8%已經可以開始撤退。

聽鬼佬炒作老手話，如果在一個中長期升市中，應該單邊去買，趁每次回調吸納，等升到咁上下減一部份倉，等佢回落時揸番，第一唔好沽清，第二買入後如睇錯唔跌反升，事先定好位「止蝕」重新追入。基本上在長期升市中較難買跌，因為跌浪通常短而淺，唔一定夠深度和時間俾你食糊。

但在一個中長期的跌市中，就好難單邊買跌，因為跌市跌得快而急，但亦彈得快而急，它的走勢無升市咁慢，你單邊買跌，遇上佢大反彈急升，你都唔易捱，隨時要被逼打靶。 所以跌市可以估跌時買跌，估彈時買升，當然亦可以分開注碼比重，買跌時買10成，買彈時只買7成。

炒作一定要睇大勢，最後一個提示，唔好想食到盡，在一個升市中，如估計有10%回調跌幅，在跌7%、8%時買到貨都算唔錯，買完再跌就捱吓，只要大市大勢向上，最後都會帶番你出紅海。

順勢而炒

儘管蘋果電腦及建築商Caterpillar等多家公司季度業績理想，但樓市資料令人失望，加上美元反彈，商品價格回落，美股受壓。杜指開市後即向下走，反覆下挫至10000點附近才見支持，最低跌過99點，午後跌幅收窄。

杜指收報10041點，挫51點或0.5%；標普500指數收報1091點，跌7點或0.6%；納指挫13點或0.6%，收報2163點。紐約證交所成交12.3億股。杜指期貨最新報9985點，比現貨低水56點。

Yahoo在收市後公布業績，受惠於控制成本得力，佢季度業績好過預期，收市後成交價漲3.6%。雖然美股昨日回落，但美國上市公司公布第三季度業績多數超過預期，據湯森路透統計，截至昨日下午，已有95家標普500指數成分股公佈業績，其中79%超過預期，僅有11%低於預期，股市基調良好。

港股在美國的預託證券偏軟，ADR港比指數收報22224點，比香港收市低161點或0.7%。匯控收報88.63元，比香港收市低0.8%；中移動收報77.88元，比香港收市低1.1%。

美國商務部公部美國9月新屋動工以年計上升5%至59萬間，低過市場預期的61萬間，增長步伐亦遠差過預期，建屋許可證亦在三個月內第二次下跌。另外，生產者價格資料亦意外回落，顯示經濟復甦力度不夠。其實過去4個月新屋動工數字都在59萬間左右，和2006年一個月有200萬間新屋動工相比，數字大幅回落，講好聽啲就係從年初的低位反彈，講唔好聽啲就係距離正常尚遠，由此估計，美國政府向首次置業者提供的稅務優惠會繼續下去。

房屋建築商類股挨沽，杜琼斯房屋建築分類指數勁挫2.1%，拖累大市向下。其中Pulte Homes跌5%，Lennar Corp跌2.9%，最大的家品供應可連鎖店Home Depot下滑2.4%。

美元兌歐羅從14個月低位反彈，原油及黃金等商品價格回落，Reuters/Jefferies CRB商品指數在七個交易日中首度下挫。標普500原材料生產商類股下挫1.1%。

網友阿Ray問起「順勢而炒」時要執行紀律時的心魔，我估佢所指的心魔，是指定好止賺止蝕盤，但到時卻不能執行的心魔。其實心魔之產生，主要源於人類本性的貪婪和恐懼。你買一隻股，本來定好咗輸一成打靶，贏兩成開始定止賺位(例如定在贏一成的位置)，若順勢向上一路推高止賺位，若逆勢回落到止賺位就平倉離場，計劃定得好完美，但大多數時候執行唔到。

最多人守唔到止蝕，因為人有恐懼，怕輸，唔想輸錢，所以跌到止蝕位時，又想睇吓，因為一平倉就輸，一日未平倉都可以話「有賭未為輸」。我有個朋友係炒匯老手，佢講俾我聽一個故事，佢剛出來做咗一兩年嘢的時候，自己未識炒，有一個大學同學入咗外匯公司，要搵生意，我個朋友為咗幫吓同學開單，就俾咗2萬元個同學代佢炒，炒咗無耐就唔對路，同學代佢沽咗日圓，點知那一陣子日圓係咁升，但個同學無同佢止蝕平倉，因為唔想輸，最後日圓實在升得太厲害，又在另一個高位同佢買番日圓，又唔叫平倉，叫做「鎖倉」喎，咁就挾住喺中間，理論上應該搵位拆倉，但個同學又無做，結咗係咁「鎖倉」鎖咗半年，2萬元按金輸清，呢筆錢係佢做咗一兩年嘢的所有積蓄，就咁輸哂，佢只有一句總結，「輸就要認」。

唔止賺走人就係貪，假設你買隻股升咗上去，曾經贏過5萬，回番贏得1、2萬，叫你止賺離場，好少人做得到，因為好後悔無走，成日想賺番5萬先走，結果就輸突。

上述炒匯老手朋友話，匯市係全球最大投資市場，一般唔係咁易俾人操控(當然也有例外，如92年索羅斯狙擊英鎊)，所以按道理散戶和大戶都係公平競技，但散戶都係經常輸，佢認為散戶衰在無紀律，克服唔到心魔。老手話要克服心魔，要明白一個道理，用一個方法，先講道理，就係明白散戶炒作通常會輸，要自己唔輸，要用普通散戶不同的方式去炒，先有機會贏。再講方法，就係嚴守紀律，甚至可以話機械式硬跟紀律行事，佢買入一個盤短炒，一買入即定止蝕位和食糊位，炒一隻匯，定咗跌1%打靶，升1%食一半，其餘睇位食，希望可以食多啲。由於這兩個位一早定好，買入時即刻講咗俾經紀聽，到時由經紀自動執行，唔使到位再判斷，就減少自己的意見和心魔的影響。佢仲講笑咁話，幾叻的人都好，只要有倉在手，佢o既意見就變成偏見，可信程度好低也。

陸羽仁